Dison pinatudu ruhut maminta gondang na nienet sian pandohan ni Amanta R B Marpaung (Op Miduk) uju hea tinangihon maminta gondang.
1 Gondang Mulamula
Tangan do botohon, ujungna jarijari,
Jarijari sampulu marsiganjangganjangi.
Jonjong hami dison, jumolo marsantabi,
Santabi di amanta raja, santabi di inanta soripada.
On pe nuang amang parogung oloan, panggora sungkot di langit, parsoara tandos tu tano, pargonsi sitombus dolok, parpanangar na gok di rura, partaganing parunung-unung, parsarune parende-ende, partarias namalo.
Alualuhon ma jolo tu Ompunta Mulajadi, Sitompa Hasiangan, Sigomgom Parluhutan, Silehon Aek Na Tio, asa tangkas na di banua.
Alualuhon ma muse tu sahala ni amanta raja, raja na hot di adat, raja na ingot di umum, sitiop parpatihon dohot sitiop hatian.
Alualuhon ma muse tu badia ni inanta soripada mulia, ina parorot, ina batak mardinding, ina batak marparapara.
Ia nunga dialualuhon hamuna i, amang pargonsinami,
Gorga ni jabu ruma, binuat batu hula.
Manortor hami nuaeng dison, bahen hamu ma jolo Gondang Mulamula.
2 Gondang Sombasomba
Dison hami …….., asa rap marsomba hami tu Debata, dung i laos husombasomba hami ma muse ……, di antaran na bidang, di lobuan na godang on.
Ala ni i, pargonsi, laos bahen hamu ma Gondang Sombasomba i.
3 Sampur Marmeme
Asa songon na nidok ni umpasa:
Rintar songon bonang di gala,
Tio songon mata ni mual,
Jumpang na jinalahan,
Tarida na niluluan.
Bahen hamu ma, Gondang Sampur Marmeme i.
4. Gondang Simonangmonang
Asa tinoto ni ulaon on, dapot hamonangan, mandopang hahijangon, asa andar parsaulian di …… jala tongam di tonga ni mangajana.
Bahen damang ma, pargonsi, Gondang Simonangmonang i, asa mangaliat hami.
5. Gondang Sampur Marorot
Ia nunga dibahen hamu Gondang Simonangmonang i, jala nunga mangaliat hami, liat ni hagabeon ma i, liat ni parhorasan, manjalahi hamonangan, di …… rodi situan natorop, na humaliang na lumolo.
Sai anggiat ma tinoto ni ulaon on, papitahon nauli, mandimposi na denggan, pinarorot ni adat sian paradatan, pinarorot ni uhum sian paruhuman, pinarorot ni patik sian parpatihan.
On pe, nuaeng pargonsi, bahen hamu ma Godang Sampur Marorot i.
6. Gondang Didangdidang
Ia nunga dibahen hamuna Gondang Sampur Marorot i, sai pinarorot ni adat ma tutu, pinarorot ni patik dohot uhum, saluhut hasuhuton on dohot nahumaliang.
Tinoto ni ulaon on, anggiat ma ……
Tuhanta ma na masumasu hita, dohot mandidangdidang sude gomparan ni ……, asa rap mandidang sahala ni amanta raja, dohot badia ni inanta soripada mulia.
Bahen hamu muse Gondang Didangdidang i.
7. Gondang Sitiotio dohot Hasahatan
Pininta ni ulaon ……. on anggiat ma songon hata ni sijolojolo tubu:
Marsiaminaminan songon lampak ni gaol,
Marsitungkoltungkolan songon suhat di robean.
mangulahon dibagasan sada pangkilaan
asa marjunjungan songon dolok
marbanggua songon rura
jumpang na jinalahan
tarida na niluluan.
Las ma dingindingin, las ginolomgolom,
Horas ma tondi jala madingin, Tuhanta ma na manggomgom.
Martantan ma baringin, mardangka hariara,
Matorop maribur ma gomparan ni ……
Matangkang ma juara.
Sitongka ma di hita na sambar parnidaan,
sitongka ma nipi na halobuan,
sitongka ma bala ni na niula,
sitongka ma sahitsahit tu jolma.
Sai sipatiur na di juluan ma, jala sipatio na di jaean, di saluhut ……. on.
Sahatsahat ni solu ma, sahat tu bontean,
Sai sahat ma ……. on,
Sahat gabe, sahat horas.
Sahat ma nauli, sahat ma na denggan hasahatan ni tortornami bahen hamu ma Gondang Sitiotio.
PARTUNGKOAN :
Di loloan partungkoan rap dohot natuatua dohot panangkasion sian angka pargonsi, dang dung hea masa nahinan adong padomu-domu gondang songon pamintaon namasa saonari.
Tabege angka sipinta gondang saonari mandok : Amang panggual pargonsi, bahen hamu ma gondang mulamula, padomu tu gondang somba, padomu tu sampur marorot, padomu tu …. dohot tu hasahatan. Gondang napulpal do didok gondang sisongon i.
Jotjot do masa tarida di angka ulaon nuaeng, tutur do nasida, didok tu pargonsi, aluaaluhon hamu jolo tu …dohot tu …
Ganup panortor sai mangido “gondang hasahatan padomu tu sitiotio”
Pargonsi namatua mandok, molo so tangkas dipangido panortor, olo do pargonsi mangalusi “patangkas hamu pangidoan mu”. Suang songon i do nang tu pargonsi molo so diboto gondang pangidoan ni panortor olo do panortor i mandok “patangkas hamu jolo”.
Ingkon malo do pargonsi mangalapati hata pangidoan ni panortor, ipe asa dibahen gondangna. Olo do panortor namalo mangidohon goar ni gondang sitortoranna. Lapatanna, dung didok hatana, “gondang … ma bahen hamu” ninna.
Molo tung sada gondang pe sitortoran, boi do hatahonon angka hata pasupasu mardongan umpasa alai dirimpun ma gondangna sada. Boi do pangidoon goar ni gondang i, alai boi do dohonon tu pargonsi asa nasida manontuhon, atik so haru tangkas diboto panortor goar ni gondang i. Molo hurang singkop, boi do sundatan asa disingkati gondang i.
Asing do gondang sitio-tio tu gondang hasahatan. Humatop do urdot ni gondang sitio-tio tu gondang hasahatan.
Pangidoan “hata pangalualuan/alualu” hasurungan ni suhut rap dohot raja do i uju mamuhai ulaon. Gondang Mulamula pe uju mamuhai gondang do i dipangido raja rap dohot suhut. Ia gondang Hasahatan uju manggogi ulaon do i, tingki raja mananti ulaon panggohi.
Hasomalan ni panortor nahinan uju manggohi panortoronna dodok ma ; “Hasahatan ni tortornami, bahen ma gondang sitio-tio”. Jadi tangkas do dang didok “padomu ma gondang hasahatan tu sitiotio”
Uju panortoron, holan pargonsi nama dongan masisisean, ai nunga tumimbo ibana sian saluhut natorop dohot sian raja. Raja pe uju manortor ingkon disise do pargonsi. Ima dalanna didok nasida “bataraguru humundul” ai dipansa dohot di halang gordang ni ruma do nasida hundul. Holan uju Raja Sisingamangaraja do manortor dang marpansa pargonsi.
Adong do ragam pandohan pangidoan gondang Sampur Marmeme dohot Sampur Marorot. Nadeba mandok Saudara Marorot dohot Sampuara Marorot, Sampuara Marmeme.
Adong do lapatan naasing sian hata sampur, ima namandok “sirnip”, mangaleap sian bibir ni hudon, adong mangalapati mardomu. Hata mardomu “sampur” pe adong do tu lapatan ni “bersenggama”. tanobatak.wordpress.com. Monang Naipospos
No comments:
Post a Comment