Patujolo
Sian perspektif ni sejarah tung mansai maol do mandapothon sada pembuktian positif laho patoranghon latar belakang ni ompunta si Raja Hasibuan dohot angka pinomparna. Ala na so adong bukti-bukti otentik na boi bahenonnta mendukung angka barita na ta boto tarsingot di jujur ngolu ni Si Raja Hasibuan dohot anak nang boruna. Alai sian perspektif legenda manang turi-turian, tong-tong na boi do bahenonnta laho mangantusi jujur ngolu ni ompunta si Raja Hasibuan secara garis besar. Jala adong do maragam turi-turian na sanga ta bege manang ta jaha tarsingot ni Ompunta Si Raja Hasibuan. Baik na ta dapothon sian poda ni angka natua-tua, manang na boi ta jaha di buku-buku dohot internet na adong nuaeng on.
Adong do marragam turi-turian ta boto, jala sian angka turi-turian i, adong do sada benang merah na boi buanhononta laho mangantusi jujur ngolu ni Ompunta Si Raja Hasibuan. Sian benang merah (Garis besar) ni angka turi-turian i ma na hu pangke hami laho manurathon Jujur ngolu ni Ompunta si Raja Hasibuan.
Di hita saluhut pinompar ni Ompunta si Raja Hasibuan, tarlumbobi di angka na umposo jala naung tubu magodang di tano parserahan, godang do na so mangalehon roha laho mananda Ompunta i. Ndang boi salahononta di angka hita na so mangalehon roha na. Ala na so adong proses sosialisasi sian angka natua-tua tu ianakhonna, gabe ndang ditanda be ise na umpompar saluhut halak na marmarga Hasibuan.
Laho patandahon Si Raja Hasibuan tu sude hita na mangharinghothon mananda ompunta i, hu coba hami ma manurathon jujur ngolu ni ompunta i marhite sian angka turi-turian na binoto mangihuthon angka poda ni angka natua-tua na sanga binege jala angka surat-surat na boi nijaha. Tontu sahali, tung maol do laho manghatindanghon hasintongan ni jujur ngolu on, ala so adong data-data empiris na boi bahenon sebagai bukti positif ni jujur ngolu ni ompunta si Raja Hasibuan.
Songon sada “legenda” naung diakui sebagai riwaya hidup ni ompunta, boi do tongtong turi-turian i bahenon laho patandahon Ompunta tu angka generasi na umposo. Anggiat marhite panandaion i, boi tubu roha na mangharinghothon nang manghaholongi angka partaromboon ni hita marga Hasibuan. Asa unang mago angka poda dohot uhum na uli naung pinungka ni angka ompunta na parjolo. Didok hata ni umpama “Molo tuat hita sian dolok, martungkot ma hita siala gundi. Adat dohot uhum na uli, naung pinongka ni ompunta na parjolo, na ingkon do ihuthonnonta angka pinomparna na parpudi.”
Andorang so hutorushon hami na manurat surat on, asa parjolo ma tutu dohonan nami songon hata ni natua-tua : ”Asa tangan do ninna botohon, ujungna jari-jari, Jari-jari na sampulu alai marsiganjang-ganjangi. Ia hami laho manurathon, alai parjolo ma tutu hami marsantabi. Molo adong angka na hurang, haha anggi ma na manggohi, jala molo adong angka na sala, natua-tua ma na maniroi”
Sian Tuan Sorimangaraja tu Raja Sobu.
Ia Tuan Sori Mangaraja ima anak ni Raja Isumbaon siangkangan (Sihahaan). Anak si paidua ima Raja Asiasi, jala anak siampudan ima Sangkar Somalidang. Tuan Sori Mangaraja mangalap 3 ripe. Soripada na parjolo ima Boru Anting-anting Sabungan na dipanggoarhon Nai Ambaton, Soripada na si paidua ima boru Biding Laut na dipanggoarhon Nai Rasaon. Ripe na si paitolu ima Boru Parsanggul Haomasan na dipanggoarhon Nai Suanon.
Sian Ripe na parjolo Nai Ambaton, tubu ma anakna sada ima Raja Tuan Na Bolon manang Tuan Sorba Dijulu. Sian Nai Rasaon tubu ma anakna Datu Pejel manang Tuan Sorba Dijae. Sian Nai Suanon tubuma anakna Tuan Sorba Dibanua.
Tuan Sorba Dibanua mangalap 2 ripe. Ripe na parjolo ima Boru Si Basopaet. Hanuhon, boru sian Kerajaan Majapahit Iboto ni Raja Raden Wijaya. Ala leleng ndang sorangon Buha Baju, dialap Tuan Sorba Dibanua ma muse Boru ni Raja Borbor ima Nai Anting Malela.
Sian Nai Anting Malela, tubu ma 5 (lima) anak ni Tuan Sorba Dibanua, ima 1. Raja Silahisabungan, 2. Sibagot Ni Pohan, 3. Si Paettua, 4. Si Raja Oloan dohot 5 Si Raja Huta Lima. Sian Boru si Basopaet, Tubu ma anak ni Tuan Sorba Dibanua 3 (Tolu), ima Raja Sumba, Raja Sobu dohot Raja Naipospos.
Adong do sada turi-turian, tarsingot tu pinompar ni Tuan Sorba Dibanua na 8 (ualu) on. Tarsongonon ma barita na. Ia Boru Si Bsopaet mansai leleng ndang marbuha baju. Ala ni i tung mansai marsak do Tuan Sorba Dibanua. Manigor leleng ndang marianakhon, dialap Tuan Sorba Dibanua ma boru ni Tulang na Raja Borbor, Nai Anting Malela.
Songon naung pinatorang di ginjang. Pintor tubuan 5 Anak do Nai Anting Malela. Ima na ginoaran. Raja Silahisabungan, Raja Sibagot Ni Pohan, Raja Si Paettua, Raja Oloan dohot Raja Huta Lima.
Dung magodang, anak na lima on, na so panagaman na Tuan Sorba Dibanua, Sorangan anak ma Boru Si Basopaet, Tolu Linduat. (Kembar 3) Di na sorang anak na, Dipaboa Si Baso (Datu/ Dukun Beranak) ma tu Tuan Sorba Dibanua. Ala las ni roha na, pintor hatop ma Tuan Sorba Di Banua mandapothon soripada na tubu-tubuan. Ia dung didapothon, diida Tuan Sorba Dibanua ma ianakhonna na Tolu Linduat i songon tolor ala dibalun ari-arina do ianakhonna. Ala tung mansai roa do dibereng ianakhonna i, ro ma hata ni Tuan Surba Dibanua mandok :”Ndang anakhu i, anak ni begu ma i”.
Dilungun ni roha ni Boru Si Basopaet umbege hata ni Parsinonduk na i, Jala ala ni ila ni roha na, didok Boru Si Basopaet ma tu Si Baso i, asa ditabunihon ma angka ianakhona i, sada tu Sumban (Parsobanan) ni Sopo na. sada tu Inganan ni Sobuan (Paremean ni Sopo) jala sada ditabunihon di Salean ni sopo na tung mansai birong situtu (Naipos-iposon).
Ia dang sadia leleng, habang ma sada Lali di di huta jala manghaliangi Sopo ni Boru si Basopaet, dungi maturtur ma ari-ari ni ianakhon ni Boru Si Basopaet na dipeakhon di parsobanan (Sumban) di Para-para ni sopo i. pintor tangis ma ianakhon nai. Mansai las situtu ma roha ni Boru Si Basopaet, ai jolma do hape na tinubuhonna i. Digoari ma ianakhonna i. Sumba. Mangihut ma muse ianakhonna na dipeakhon di Sobuan i, digoari ma Sobu. Jala parpudi ma ianakhonna dipeakhon di Salean naipos-iposon i, digoari ma Naipos-pos. Jala dipagodang-godang Boru Si Basopaet ma anak na tolu i.
Ia Tuan Sorba Di Banua ndang lomo roha na marnida anakna na tolu i, dung magodang Si Sumba, Si Sobu dohot Si Naipos-pos, digora Amongna ma nasida. Didok ma : “Ai nunga magodang be hamu. Jala nunga marhasaktion be. Ala ni i, marsiadu hasaktion ma jo hamu na tolu, dohot haha muna na lima i”. Dilehon Tuan Sorba Dibanua ma tumbak sian Bona ni Tolong tu ianakhonna na ualu I sada-sada be. Jala dipauji ma nasida masitullangan. Dinaso parbinotoan ni si Tolu Saina i, dibahen Tuan Sorba Dibanua ma tu ulu ni Tumbak ni anakna na lima Saina Bosi na rantos.
Dung marpungu jala marsiadopan anak ni Tuan Sorba Dibanua na Lima sa Ina dohot na Tolu sa Ina, disungkun tubu ni Baru Si Basopaet ma tu Amangna i : “Ise ma hami na parjolo manullang ?” Dialusi Tuan Sorba Dibanua ma : “Ala Haha muna na lima do na parjolo tubu, ba nasida ma na parjolo manullang”. Saut ma anakna na lima tubu ni Nai Anting Malela parjolo manullang angina tubu ni Boru Si Basopaet.
Manigor ditullang hahana na lima i anggina na tolu i, boi do ditangkup anggina i tumbak ni hahana. Dung ditangkup anggina na tolu tumbak ni hahana, diida nasida ma Bosi na Rantus di ulu ni tumbak ni hahana. Jala las tumbak ni hahana i ma diaben manullang angka hahana na lima i. Sian hahana na lima i, hona tullang do Si Raja Huta Lima, jala manigor mate. Umbahen i do, na mago sada Anak ni Tuan Sorba Dibanua sian Nai Anting Malela ndang marpinompar.
Dinamate si Raja Huta Lima, ditonahon Tuan Sorba Dibanua ma tu anakna na opat na i sian Boru Nai Anting Malela. Ia molo marpesta angka pinompar na i, diulahon ma di ari Si Paha Lima. Asa adong parningotan tu si Raja Huta Lima na mate i. Jala ala sogo ni roha ni Tuan Sorba Di Banua tu anakna na tolu, dipalaho ma nasida sian Huta ni Tuan Sorba Dibanua di Lumban Gorat, Balige.
Dung dipalaho Tuan Sorba Dibanua Anakna na tolu i, borhat ma nasida jala marserak ma. Si Raja Sumba borhat jala maringanan di Lintong Ni Huta Paranginan, Si Raja Sobu maringanan di Lobu si Gala di toru ni Dolok Tolong. Si Raja Naipos-pos borhat jala maringan di Sipoholon.
Ompu Raja Hasibuan
Dung maringanan Raja Sobu di Lobu Sigala-gala, marpinompar ma, jala tubuma anakna 2 (dua). Anakna na parjolo ima Raja Sitompul. Sipaidua ima Ompunta si Raja Hasibuan. Dung magodang Ompunta i, dialap ma Boru ni Raja Simatupang na margoar Boru Mangiring Omas, sian Huta Unte Mukur, Muara. Adong do disuan Ompunta si Raja Hasibuan Bona ni Pinasa di huta ni Simatuana di Muara. Jala sahat tu saonari, mangolu dope Bona ni Pinasa i jala marparbue. Ala ni i do, umbahen na marmata ni ari binsar hita sude marga Hasibuan tu sude pinompar ni Raja Simatupang.
Dung mardongan saripe si Raja Hasibuan dohot Mangiring Omas Br. Simatupang, marsangkap ma nasida laho mangulului ampapaga na lomak. Diida Tao Toba jala marsiajar ma nasida marsolu-solu. Dung malo nasida marsolu, marluga-luga ma nasida di Tao i, di na marluga-luga, tompu ma ro Alogo Lubis sian Bangkara. Diboan alogo ma nasida tu bariba ni Tao. Sahat ma nasida tu sada inganan na gok batu na mansai mohop. Di goari nasida ma huta i, Lobu Batu Gara. Jalan maringanan ma nasida di Lobu Batu Gara.
Ompunta si Raja Hasibuan mangingani Lobu Batu Gara hira-hira di Taon 1550 (Abad XV) Torop do pinompar ni Si Raja Hasibuan dohot ompunta boru, ima 5 (lima) Anak dohot 5 (lima) Boru. Ia angka goar ni anakna : Raja Marjalo, Guru Mangaloksa, Guru Hinobaan, Guru Maniti dohot Raja Marjalang. Goar ni Boru na lima i, on ma : Boru Turasi, , Boru Sande Balige, Boru Taripar Laut, Boru Tumandi dohot Boru Patar Na Uli.
Ia boruna na lima i, dipahuta ma parjolo Boru Turasi tu Raja Margumis Sitorus Pane di Lumban Lobu. Na paduahon Boru Sande Balige tu Raja Marsundung Simanjuntak di Sitandihon Balige. Na patoluhon Boru Taripar Laut tu Raja Panjaitan di Sitorang, na paopathon Boru Tumandi tu Raja Parluhutan Siahaan di Sibuntuon, Balige. Na palimahon Boru Patar Na Uli tu Raja Siringo-ringo di Muara.
Tarsongonon ma muse angka Pauseang na nilehon ni Si Raja Hasibuan tu angka boruna na lima i. Tu Boru Turasi dipasahat ma Pauseang Parbue Si Pitu Hallung, ima na nilehon ni Datu sian Malim. Tu Boru Sande Balige dipasahat ma Pauseang Hauma. Tu Boru Taripar laut dipasahat ma Pauseang Seak-seak mas na marisihon Rere dohot Hujur Siambilo. Tu Boru Tumandi dipasahat ma Pauseang Losung Si Pitu Mata dohot Mual Parhombaran. Ia si Boru Patar Nauli, ima anak siampudan ni Si Raja Hasibuan, tading ma etek do Ibana, jala sian Jolo ni Ibotona Si Guru Mangaloksa do ibana dipahuta tu Raja Siringo-ringo di Muara, umbahen I do na so dapotan pauseang Boru Patar Nauli sian natorasna si Raja Hasibuan
Sian Lobu Batu Gara marserak tu sude luat portibi.
Si Raja Hasibuan tarbarita do di luat Uluan, sada Raja na gabe. Lima anakna jala lima boruna, hape sada do Soripadana. Sude Raja na sian Holbung dohot sian Uluan, marsanghap laho mangalap angka Boruna. Dung matua Ompunta i, marujung ngolu ma ibana hape ndang adong dope pinompar na baoa na lima i na marhasohotan. Laos mangihut muse ma ompunta boru Simatupang marujung ngolu.
Dilaon-laon ni ari, adong ma ro sada jolma ima na ginoaran Raja Tuan Sogar Manurung tu Lobu Batu Gara. Ima na laho maminjam Ogung Omas tading-tading ni Ompunta Si Raja Hasibuan. Di na ro Raja Tuan Sogar Manurung, ima pinompar ni Raja Mangarerak na sian Sibisa, tung songgot si tutu do roha nasida na lima, ala so di tanda nasida halak na ro on, jala soadong dope hombar ni huta na. Jadi didok nasida ma : “Laho ma ho ! Ndang hu tanda hami ho !”. Sanga do tolu hali ro Raja Tuan Sogar, alai sai di palaho nasida do.
Ala ni muruk ni roha na, martahi ma Raja Tuan Sogar tu Pinompar ni ompunta na lima i. Dihali ma parik ni huta Lobu Gara i, huhut ditullangi ma angka bulung-bulung humaliang ni huta mardongan indahan rima-rima. Disada tingki mijur ma nasian huta tu balian ni huta. Diida ma angka na masa i, longang ma rohana jala dipaboa ma tu angka na dihuta. Gabe dang sonang be roha nasida tu balian. Di huta ma nasida sasude. Dung masa songoni roma muse jolma mamboan angka hujur jala sai didok : “Musu ! Musu ! Musu !”
Alani biar ni nasida na lima, marsangkap ma nasida borhat laho manadinghon huta Lobu Batu Gara i. Di na laho borhat nasida. Sai tinggal ma Biang ni Si Raja Marjalo di huta, ndang olo mangihuthon tuanna. Ala na so olo mangihuthon ibana, mijur ma si Raja Marjalo mangihuthon biangna i. Didok ma tu angka tinodohonna I asa borhat parjolo tu bariba tao. Jala dipasahatma hujur ni podang na tu anggina las didok ma : “Ia manang di dia hamu maringanan, tanom hamu ma hujur ni podanghon. Asa hu boto na disi hamu”.
Ia si Guru Mangaloksa, di na laho borhat maninggalhon huta na i, di boan ibana dope Tano Sampohul, dohot Mual sada tabu-tabu. Borhat ma nasida na opat rap dohot ibotona siampudan, dompak Hasundutan ma nasida borhat. manaripari tao sahat ma nasida tu topi tao ni Muara. Ia dung sahat nasida na opat tu bariba tao, didok Guru Mangaloksa ma tu anggina na tolu i. Ninna ma : “Torushon hamu ma pardalanan muna, ahu ma na paimahon hahanta”. Dung didok Hahana songoni tu nasida, borhat ma Guru Hinobaan, Guru Maniti dohot Guru Marjalang manorushon pardalanan nasida dompak Habinsaran. Ia guru Hinobaan maringanan ma di Sipirok, sian Sipirok marserak tu Barus, Sibolga sahat tu Asahan. Guru Maniti maringanan di Padang Bolak. Sian Padang Bolak marserak ma sahat tu tano Riau. Ia Guru Marjalang maringanan ma di huta Lobu Botung (Motung) di topi ni Aek Barumun. Digoari ma nasida Hasibuan botung (motung). Sian Lobu Botung ma nasida marserak tu Sibuhuan. I ma di huta Djanji lobi.
Leleng do Guru Mangaloksa rap dohot ibotona Boru Patar Nauli paimahon Hahana si Raja Marjalo. Alai ndang marnaro hahana i, dungi marsangkap ma ibana laho manorushon pardalananna. Andorang so borhat Ibana, dipantikhon Ibana ma hujur ni podang ni hahana I tu tano. Anggiat molo saut Hahana I ro mandapothon anggina, diboto ma na hipas do nasida manaripari tao jala sanga paimahon Raja Marjalo disi. Hanuhon, gabe suan-suanon do hujur ni podang na pinantikhon ni Guru Mangaloksa i, na sora magodang, na sora marmetmet.
Si Raja Marjalo mangingani Lumban Bao, Sibuntuon.
Dinalaho ma Ompunta na lima bungkas sian hutanai (Batu gara),alai, ala tinggal asu ni Raja marjalo gabe mulak ma ibana muse tu pudi jala manginsugut di bona ni sanggar na sohona loslos i jala topet do songgop pidong setset di punsu nisanggar i laos gaor ma seset i songon napaboahon adong jolma martabuni disi, alai dipangido Raja marjalo ma tu seset i : “Unang ma laho ho sian i seset, unang dapot ni musu i ahu dison annon ,ai molo laho ho sian i luluanna jala gabe botoon ni musu i do ahu na dison jala padanhu tu ho naso jadi do hasoanhu ho sahat rodi pinomparmu tu pinomparhu ndang jadi pangannonna dagingmu” ninna mandok seset i.
Alani i sai tong ma disi meat seset i. Mamolus ma muse angka jolma na sinuru ni Tuan Sogar sian i laho mangalului nasida, jala sanga do ditilik tu sanggar i, ala diida di pidong seset songgop disi dang laho rohana manigati bona ni sanggar i, gabe didok rohana do: “Sugari adong jolma disi dang tagamon adong songgop seset disi’, ninna. Jadi malua ma Raja Marjalo sian jea i di hatiha i. Jala sian i ma ibana manongon tu ramba na dingkan hasundutan, jonok tu Sibuntuon, Janji Matogu. Jala laos disi ma ibana masibuni paima-ima asuna na mago i, laos mangula pandaramanna. Disuan ibana ma jelok jala ramos do parbuena. Ianggo didok juma ni Tuan Ria do inon nian. Adong do didok boru ni Tuan Ria Sibuntuon sisada tarus, sai jotjot do ibana i laho tu juma i mansalong haporluan siapari. Jala diida ma jelok i naung lan parbuena, gabe dibuat ibana ma sada parbue ni jelok i laos songon i ma muse padua halihon.
Dung patolu halihon tarjegot ma ibana di juma i jala hadapotan di bahen Raja marjalo, didok ma: “Hee…i asa tung lomo-lomom mambuat na so ugasanmu?” ninna. Tarhatotong ma boru ni Tuan i jala hatahutan. Alusna : “Ai juma ni damang do on boasa oraanmu ahu mambuat nasinuan ni damang ?” Jadi ro ma Raja marjalo mandok : “ Ahu do manuan i ndang Amangmu!”
Jadi marbagas roha roha ma Boru ni Tuan Ria i dohot Ompunta si Raja Marjalo disi laos soangir ma Boru ni Tua Ria i. Longang ma Tuan Ria mida borunai jala di sungkun ma: “Ai ise do donganmu boru umbahen songonon ho ?” Jadi sai tangis ma borunai dang pintor olo paboahon. Alai sai diunung Tuan Ria do boruna i. Alai marpangidoan ma boru ondeng tu amana i naso jadi bunuon manang agia dihahua sibaoa dongan nai.
Jadi ninna Tuan Ria ma tu borunai : “Paboa ma inang ise ma huroha dongan mu asa songon on ho?” Jadi di paboa ma na Raja Marjalo do donganna. “Bah na so adat naso uhum do i nian ito ,alai beha ma bahenonhu sotung ma marmuruk anon dohot Amang tuam ai musuna do inon?” Ninna Tuan Ria do tu boruna i.
Alani i Humalaput ma ibana mandapothon Tuan sogar jala marsomba paboa sorbanna ala na masa i tu borunai ; “Tung marpamuati ma roham mida ahu, huelek ma mabadia ni roham dahahang mida musum Alana nunga tung songon i huroha nasibta marboru naingkon saut ma ibana tu musui”, ninna Tuan Ria ma tu Hahana Tuan Sogar. Jadi dioloi Tuan Sogar do pangidoan ni Tuan Ria i unang pola be agia di hahua Raja Marjalo. Gabe dipasaut ma boruna i tu Raja marjalo. Jala dilehon ma jumanai songon pauseang tu boruna i, laos disi ma dipajonjong bale-balena. Ima mulana huta Lumban Bao. Ai marhuta di huta ni baona do si Raja Marjalo.
Dung maringanan di Lumban Bao Ompunta si Raja Marjalo, disuan ma hariara laho partandaan ni huta i. Jala sian bona ni haraiara I, haruar ma aek na sun mansai tio. Digoari ma Hariara i, Hariara Marjalo dohot mata ni mual i, mual Hariara Marjalo. Sahat tu saonari, jongjong dope bona ni hariari i, suang songoni nang mata ni mual i. Ia dung denggan Si Raja Marjalo mangingani huta na di Lumban Bao, di panangkok si Raja Marjalo ma saring-saring ni Amang na Si Raja Hasibuan, sian huta Lobu Batu Gara, jala disuanhon ma di Lumban Bao. Alani ma, hot ma nuaeng dipajongjong Tugu Parsadaan ni sude Marga Hasibuan di Lumban Bao, Sibuntuon.
Marpinompari ma Ompunta Si Raja Marjalo dohot Boru ni Tuan Ria, tubu ma anakna 3 (tolu) boru. Boru na parjolo marhamuliaan tu paribanna marga Simanjuntak, ima Raja Parsuratan Simanjuntak, anak ni Raja Marsundung tubu ni Boru Hasibuan. Boru si Paidua marhamulian tu anak ni Namboruna marga Panjaitan, ima Raja Si Tungo, anak ni Si Raja Panjaitan tubu ni boru Hasibuan. Ia boru na siampudan, marhamulian ma tu marga Simangunsong, ima Raja Mardagul Simangunsong. Ia Boru ni Tuan Ria Manurung, ndang dope marianakhon baoa, nunga pintor marujung ngolu. Ala ni burju ni si RajaMarjalo tu hula-hula na, dipasaut Raja Tuan Ria Manurung ma muse, boru ni anggi na Raja Udan Manurung tu si Raja Marjalo. Sian boru ni Raja Udan Manurung, tubu ma anak ni si Raja Marjalo 3 (tolu) baoa. Ima Raja Situstus, Ompu Talobu, dohot Pande Anduri.
Dung marujung ngolu ompunta boru ni Raja Udan Manurung, mangalap boru ma muse Ompunta si Raja Marjala, ima boru Sinurat, boru ni Raja Silepe na sian Lumban Sinurat, Janji Matogu. Sian Ompunta Boru Sinurat, tubu ma anak ni Si RajaMarjalo, 1 (sada) baoa . Ala marrara do pamatang ni ianakohonnai, digoari ma si Rara. Jala dung magodang, marguru hadatuon ma ibana, gabe digoari ma Datu Rara.
Di laon-laon ni ari, dung marujung ngolu, Ompunta Si Raja Marjalo, adong ma masa hagunturon di Huta Sigaol. Ima dinaro halak na sian Samosir laho manghaliangi huta Sigaol. Hatiha i, na mangingani huta Sigaol, ima marga Manurung dohot Butar-butar do. Di hagunturon i, martahi ma angka Horja, ima natua-tua ni Marga Manurung, Marga Butar-butar dohot Marga Hasibuan laho mangalo jolma na ro sian Samosir i. Ia dung marsada nasida boi ma nasida palaohon jolma na giot manghaliangi huta Sigaol. Ala ni na dohot do marga Hasibuan di na mangalo musu na ro i, dilehon marga Manurung dohot Marga Butar-butar ma tano parhutaan tu Hasibuan di Sigaol.
Ia dung sahat tingkina, mangalap boru ma Raja Situstus, ima Boru ni Raja Sitorus Boltok na sian Raut Bosi. Jala ala tung metmet do huta Lumban Bao, bingkas ma Raja Situstus tu Sigaol, tu tano naung dilehon ni Marga Manurung dohot Marga Butar-butar. Ia Ompu Talobu, dialap do Boru Butar-Butar, ima boru Bahal Gaja Butar-butar Tuan Di Rambe na sian Sigaol, gabe las maringanan di Sigaol ma nasida rap dohot hahana Raja Situstus. Anak ni Raja Marjao si paitolu, ima Pande Anduri, dialap ma Boru ni Tulangna, Boru Sianturi na sian Muara. Maringanan ma nasida di Huta Tinggi, Laguboti. Ia dung maringanan Pande Anduri di Huta Tinggi, digoari ma Ibana Saudagar Nabegu. Mamungka sian ima, ndang dipanggoarhon be Pande Anduri, gabe Saudagar Nabegu ma goarna. Sian Huta Tinggi marserak ma pinompar ni Saudagar Nabegu tu Parsoburan, tu Garoga, sahat tu Sipirok.
Anak ni Si Raja Marjalo siampudan, ima Datu Rara, dialap ma boru ni Tulangna, Boru Sinurat. Sonduk hela ma ibana di huta ni Hula-hula na di Janji Matogu, jala maringanan di Lumban Godung, Janji Matogu. Ia Datu Rara 6 (onom) ma pinomparna. 2 (dua) baoa dohot 4 (opat) boru. Anak na dua i, tinggal do mangingani bona pasogitna di Janji Matogu. Boruna na opat i, dipahuta ma parjolo tu Marga Panjaitan di Sitorang, ima tu Raja Sijorat Paraliman, anak ni Raja Si Ponot, Pahompu ni Raja Situngo na mangalap boru Hasibuan. Boru si Paidua dipahuta ma tu Lumban Balian Sigumpar tu Marga Simangungsong Juara Mangan. Boru Si Paitolu marhuta ma tu Lobu Tolong, nialap ni Marga Sinaga Uruk. Boru na Siampudan ma dialap Raja Sopiak Langit Sipahutar. Sian Janji Matogu marserak do pinompar ni Datu Rara sahat tu Sumatera Timur, suang songoni tu Barus, Sibolga.
Ia pinompar ni Raja Situstus, adong do na mangingani huta di Lumban Hasibuan, Janji Matogu , ima pinompar ni Raja Pumira na gabe sonduk hela tu hula-hula Manurung Huta Gurgur, adong na mangingani Lumban Hasibuan di Lumban Nabolon ima sonduk hela tu hula-hula Sitorus Dori Lumban Nabolon. Suang songoni adong do na mangingani Sosor Silobu, ima pinompor ni Raja Lohot na sonduk hela tu hula-hula Sirait Lumban Lintong.
Pinompar ni Ompu Talobu 4 (opat) do. 3 (tolu) ma baoa, 1 (sada) boru. Ima Raja Sumonak, Ompu Poltak dohot Raja Paragat-agat. Boruna sasada i, dipahuta ma tu marga Batubara sian huta Tambunan, Balige. Ia Pinompar ni Raja Sumonak hot do holan maringanan di Sigaol, jala adong muse do na mulak mangingani huta ni ompung na di Lumban Bao, Sibuntuon. Ima pinompar ni Ompu Ambarbolak sian Ama ni Manampolak. Ompu Poltak, borhat do sian Sigaol jala maringanan di Huta Pangunjungan, Parsoburan. Molo Raja Paragat-agat, hanuhon bingkas do tu Silamosik. Alai gabe muba do margana gabe Marga Sitorus, ima marga ni na mangingani huta i. Songoni ma partording ni Pinompar ni Raja Marjalo, anak ni Si Raja Hasibuan sihahaan.
Guru Mangaloksa Ompu ni Si Opat Pusoran.
Dung leleng Guru Mangaloksa rap dohot ibotona boru Patar Nauli paimahon hahana, jala dung dipatikhon Ibana hujur ni podang ni hahana i, borhat ma Guru Mangaloksa manorushon pardalananna. Di na mardalan ibana rap dohot Ibotona Boru Patar Nauli, pajumpang ma ibana dohot Raja Siringo-ringo na marhuta di Muara. Sanga do Guru Mangaloksa marjuji dohot Raja Siringo-ringo, alai talu do ibana. Di na talu Guru Mangaloksa marjuji mangalo Raja Siringo-ringo, gabe dipasaut Guru mangaloksa do Iboto nai tu Raja Siringo-ringo na monang i. Dung dipasaut Guru Mangaloksa ibotonai tu Raja Si Ringo-ringo, diuduti ma pardalananna. Di sada tingki, di sada harangan, diultop si Guru Mangaloksa ma sada Ursa. Alai ndang pintor mate Ursa I, hot dope marlojong. Dipaihut-ihut Guru Mangaloksa ma Ursa na niultop nai sahat tu sada Dolok, ima Dolok Siatas Barita. Sian dolok ni Siatas Barita, diida Guru Mangaloksa ma timus sian sada huta. Mardalan ma ibana dompak timus i, ima dompak Rura Silindung. Ia sahat ma ibana di huta I, ima huta ni Marga Pasaribu. Jala maringanan ma Ibana disi. Di na giot maringanan Guru Mangaloksa di huta, pola do ndang dipaloas marga Pasaribu ibana jala dipalaho-laho. Alai di dok Guru Mangaloksa ma tu marga Pasaribu i : “Ida ma ! Ai tanongku do na hu dege, jala aengku do inumanku !”. Dungi dipatudu Ibana ma tano sampohul dohot aek nasa tabu-tabu na binoanna sian huta hatubuanna Lobu Batugara. Na didok Guru Mangaloksa songoni tu Marga Pasaribu, ndang didok Marga Pasaribu be agia aha, molo pe hot do sogo ni rohana. Jala saut ma Guru Mangaloksa maringanan disi.
Masa ma hagunturon di huta ni Marga Pasaribu, ai ro do Lali si Pitu Ulu manangko angka na pinahan dohot dakdanak nasida. Pola do dibahen nasa gogo nasida laho mamunu Lali si Pitu Ulu i, alai so tolapsa. Ai diboto marga Pasaribu do na malo marultop jala marhasaktion ia si Guru Mangaloksa, ala ni i, pola do dipangido Marga Pasaribu ibana laho mamunu Lali i, jala didok na lehonon nasida boru nasida gabe parsonduk bolonna molo diurupi Guru Mangaloksa nasida. Saut do diurupi Guru Mangaloksa marga Pasaribu i mamunu Lali si Pitu Ulu, ia dung mate Lali i di ultop Guru Mangaloksa, dialapma Boru Pasaribu ima boru ni Patuan Datu Raja Bisa gabe soripadana, ima na margoar Tumaledung Br. Pasaribu.
Dilaon-laon ni ari, dipajuju Guru Mangaloksa ma ripena Boru Pasaribu tu Huta ni Simatuana, laho mangido Pauseang. Ima tano laho indahan arian ni nasida. Didok Guru Mangaloksa do tu ripena I : “Lao majo ho tu huta ni amangmu, jalo ma saotik tano laho indahan arianta”. Dinaro Boru na mandapothon Ibana, disungkun marga Pasaribu I do sangkap ni roha ni boru nai, jala dipaboa Boruna I ma songon nidok ni Parsinondukna tu amangna i. Asa dilehon saotik tano pauseang tu nasida. Umbege hata ni boru nai, pola do gorgor roha ni Marga Pasaribu i, ai diingot dope sogo niroha na tu hela na i. Alai ala didok boru na i, na tano saotik do jinalo nasida, dibuat marga Pasaribu ma sanjomput tano sian harbangan ni huta i, disuhati ma tu tandok parindahanan jala dilehon ma tu boruna asa dipasahat tu hela na Guru Mangaloksa.
Dung sahat Boru Pasaribu pajumpang dohot Guru Mangaloksa dipasahatma tano na di tandok parindahanan i, jala dipaboa ma angka tona ni Amana. Umboto i, mansai muruk ma Guru Mangaloksa, marsangkap ma ibana laho mandopang simatuana sian Hutana i.
Disada tingki di bot ni ari, laho ma Guru Mangaloksa tu balian ni huta, di tullangi ibana ma nasa suan-suanan jala dilolos ma sude angka bona ni hau. Dung i, dihilhili Ibana ma parbue ni harambir mansai rara. Dipahososhon ma gota ni harambir na sai rara i tu pamatangna. Dohot do di papungu ibana angka parbue ni poring. Dipultahi ma angka parbue ni poring i, malatak-latak mansai gogo songon soara ni bodil.
Maringkati ma Guru Mangaloksa tu huta ni Simatuana, di na hosa-hosa Ibana, didok Ibana ma tu Simatuana naung ro angka musu laho manghaliangi huta i. Didok Ibana ma muse asa borhat ma nasida manadinghon huta na i. Ia dung diida Marga Pasaribu angka suan-suanan naung lolos, dohot pamatang ni Guru Mangaloksa na marrara songon na hona tullang, gabe mabiar ma Ibana. Bingkas ma nasida sian huta na i, borhat ma mandompakhon Barus. Jala maringanan disi. Ia Guru Mangaloksa hot do di Silindung, ndang mangihuthon Simatuana. Ala ni i, adong do pandokhan na mandok : “Pasaribu na nilele ni poring”
Saut do sangkap ni Guru Mangaloksa laho mandopang simatuana sian Huta Silindung, gabe ibana ma na mangingani huta i. Marpinompar ma Ibana tubu ni Tumaledung Boru Pasaribu. Digoari do anakna sihahaan Si Raja Nabarat, ai dihatindangkon Ibana do ai na barat do na binahenna tu Simatuana. Anak na sipaidua, digoari ma Si Raja Nagabe. Ai molo pe hape barat pangalaho na tu Simatuana, tongtong dope ibana dapotan hagabeon. Ia anakna sipaitolu digoari ma Si Raja Huta Galung. Ai na manggalungi tano di balian do Guru Mangaloksa dipartubu ni anakna si paitolu i. Anak na siampudan digoarima Si Raja Huta Toruan, ala di toruan ni Huta do dilehon Guru Mangaloksa inganan ni anak na i.
Saluhut pinompar di Guru Mangaloksa mangingani luat Rura Silindung. Jala pola do masa na marsiolian pinompar na i, molo pe angka na mariboto. Pola do dilaosi nasida bongbong ni paradaton na tinonahon ni ompunta si jolo-jolo tubu. Ia dung masa na marsisoluhan diangka pinompar ni Guru Mangaloksa sahat tu sundut papituhon. Ia disundut paualuhon, dipamasa nasida ma di Silindung Pesta Bolon Manompas Bongbong Pinompar ni Guru Mangaloksa. Ima dinalaho paturehon angka partuturan di saluhut pinompar ni Guru Mangaloksa. Mamungka siani, saut ma manjujung baringin na be, pinompar ni Guru Mangaloksa na opat i. Gabe ma nasida mamungka marga Hutabarat, Panggabean, Hutagalung dohot Hutatoruan. Didok ma nasida si Opat Pusoran, ai tung songon pusoran ni aek do partuturan ni na opat marga i di na marhaha – maranggi dohot na marhula-hula boru.
Turi-turian Tompas Bongbong ni si Opat Pusoran.
Tarsingot tu turi-turian ni Ulaon Manompas Bongbong ni Pomparan Guru Mangaloksa, hu buat hami do sian sada surat na adong di Facebook ni Pomparan Raja Hasibuan, songon on ma didok disi :
... quote …
Tompas bongbong atau manompas bongbong adalah kesepakatan Tetua adat, raja dan masyarakatnya untuk memulai (beberapa) marga baru sebagai pecahanan dari marga induk.* Biasanya dilakukan setelah minimal 7 (tujuh) garis keturunan (sundut). Larangan perkawinan semarga induk dihapuskan dan antar kelompok marga baru dapat saling kawin dan mengawini. ____________________________
Seperti diketahui bahwa didaerah Tarutung yang sekarang ini bernama RURA SILINDUNG, dulu brnama Huta Marsaitbosi. Stlh Patuan Datu Raja Bisa (mertua Guru Mangaloksa) pergi ke Barus kmdian berganti nama mnjadi RURA PARMONSAKAN atau RURA MANGALOKSA NA BORBORAN, nama ini dibuat oleh Guru Mangaloksa sendiri yang merupakan Guru Monssak (Silat Batak) yg Sakti Mandraguna pd Zamannya. Didaerah ini dahulu kala banyak terjadi Kisah hidup sejarah leluhur tanah Batak seperti Perginya keturunan Borbor ke Barus, Padan Hutabarat - Silaban, Boru Natumandi, Kegiatan Misionaris, dan msih banyak lg salah satunya yaitu Manompas Bongbong. Daerah ini kemudian mnjadi pusat perkembangan Pomparan Guru Mangaloksa yg menguasai stlah mengusir marga lain yg tinggal dsana. Krn kewibawaan, keberanian dan kesaktian keempat anak Guru Mangaloksa (Raja2 Opat Pusoran) dan keturunannya shg Rura ini menjadi angker bg marga lain, shg tdk ada yg berani martandang maupun meewatinya, shg PGM agak terkucil dan menjadi komunitas yg hampir Homogen, shg rawan terjadi cinta kasih diantara sesama muda-mudinya.
Terkisah pada Generasi ke 6 keturunan Guru Mangaloksa seorang dari keturunan Si Raja Nabarat bernama Ompu Lompo tengah jatuh hati pada seorang perempuan dari keturunan Si Raja Hutatoruan, pada saat itu PGM masih bermarga Hasibuan. Karena itu tidak lazim shg Bindoran (ito wanita) membunuh Ompu Lompo. Krn kjadian itu Tuan Somarantus (generasi 7) atau anak dr abg Op. Lompo bersama keluarga meninggalkan Rura Parmonsakan menuju Lobu Panabungan (Tapsel).
Beberapa tahun kemudian, terjadilah sesuatu kejadian yang aneh di kampung tersebut. Air sungai mengalami kekeringan dan ikan-ikan banyak mati hingga merusak persawahan. Masyarakat setempat mulai bertanya-tanya apa penyebab kejadian ini semua.
Kemudian tetua adat Si Opat Pusoran menemui paranormal yang ada di kampung Aek Rangat tersebut. Si Datu akhirnya berpesan supaya Ompu Somarantus di jemput kembali ke pulang ke kampung agar Tuhan mengampuni dan mengasihi penduduk kampung itu kembali dan terhindar dari bencana kekeringan yang terjadi.
Pada awalnya Ompu Somarantus yang di jemput tetua adat tidak bersedia pulang. Tapi dengan perjanjian bahwa tetua adat hrs membalas kematian Op. Lompo dgn membunuh Bindoran. Sekembalinya Ompu Somarantus, keluarga besar Opat Pusoran berdoa kpada Tuhan Yg Maha Kuasa di kampung Aek Rangat. Tak lama kemudian hujan turun menyirami tanah persawahan hingga masyarakat masyarakat pinompar Guru Mangaloksa kembali hidup sejahtera dan makmur.
Menyangkut Si Bindoran sebagai pelaku eksekusi pemenggalan kepala Ompu Lompo, di rencanakanlah sebuah skenario membunuh beliau dalam sebuah acara pesta gondang yang di gelar untuk mengelabui. Beliau pun akhirnya mati terbunuh pada saat itu.
Waktu berlalu beberapa puluh tahun kemudian cerita kematian op. Lompo dan Bindoran mnjadi momok menakutkan bg sesama PGM. Yaitu Tuan Soripada (generasi 9 dr Guru Mangaloksa) cucu dr Tuan Somaruntus menyukai gadis keturunan Hutatoruan (dr Lbn. Tobing). Shg niat trsbt disampaikan dalam rapat adat dan akhirnya disetujui oleh Tetua adat, utk menghilangkan luka atas kematian Op. Lompo dan Bindoran dibuatlah acar memotong kerbau dan meresmikan 4 marga baru PGM sesuai dg nama Raja Opat Pusoran (Hutabarat, Panggabean, Hutagalung, Hutatoruan) tdk lg memakai marga Hasibuan. Pesta jg dilakukan di Sigaol utk meminta izin kpd leluhur.
Agar partuturan dengan Hahadoli (Pomparan Rj. Marjalo) dan Anggi doli (Pomparan Gr. Hinobaan, Gr. Maniti,Raja Marjalang) tidak menjadi janggal, dipanggillah dgn sebutan OPUNG dan dibalas dgn tutur Amang ataupun kembali Opung.
… unquote…
Di pudian ni ari, pinompar ni Panggabean, Ima Panggabean Lumban Ratus, Panggabean Simorangkir, dohot Panggabean Lumban Siagian, dohot do muse manompas bongbong. Jala mamungka marga ma Panggabean Simorangkir gabe Simorangkir. Suang Songoni Pinompar ni Hutatoruan, ima Hutapea dohot Lumbantobing. Sahat tu saonari gabe 6 (onom) marga ma pinompar ni Ompunta Guru Mangaloksa Hasibuan, ima marga Hutabarat, Panggabean, Simorangkir, Hutagalung, Hutapea dohot Lumbantobing. Ala ni pahompu ni Si Raja Hasibuan do nasida si Opat Pusoran i, sai hot ma nasida manggora “Ompung” tu saluhut marga Hasibuan.
Guru Hinobaan.
Ai ndang adong surat-surat na tarjaha niba manang poda ni natua-tua na dimemehon tu panurat tarsingot tu parpinomparon ni Ompunta Guru Hinobaan on. Holan sada do na hea binege manang binoto. Ia Prof. Dr. Albert Hasibuan, pinompar ni Ompunta Guru Hinobaan do na sian Sipirok. Asing ni i, tung mansai holom do parbinotoan tarsingot tu Ompunta si paitoluon. Holan didok, marserak do pinompar na, sian Sipirok sahat tu Barus, sahat tu Asahan.
Guru Maniti
Adong do surat na mandok, ia ompunta si paiopat, ima Guru Maniti borhat do sahat tu Tano Alas, Aceh. Las gabe didok ma pinompar na Batak 17 (sampulu pitu). Ndang tangkas, aha do lapatan ni Batak 17 on. Jala ndang adong angkup ni hatorangan ni na maringanan Guru Maniti di Tano Alas, Aceh. Di buku na sinurathon ni Op. Lintong Hasibuan, ima pinompar ni Ompunta Datu Rara na sian Janji Matogu, didok do disi, ia Ompunta Si Guru Maniti, borhat do tu Padang Bolak, las maringanan disi. Sian I ma, pinompar na marserak sahat tu Tano Riau.
Di ari na parpudi on, sanga do pajumpang hami dohot dongan tubu marga Hasibuan di Pekanbaru. Jala nasida marhuta di Kecamatan Tapung, Kabupaten Kampar, Riau. Didok dongan tubu ido, na pinompar ni Ompunta Guru Maniti do nasida. Ia bona pasogit nasida di si Dalu-dalu do, ima di ulu ni Sungai Rokan, na jonok tu Padang Bolak, Tapanuli Selatan.
Raja (Guru) Marjalang
Ia dung marsirang Guru Marjalang dohot hahana Guru Hinobaan na tading di Sipirok dohot Guru Maniti na tading di Padang Bolak, ditorushon Raja Marjalang ma pardalanan na mangihuthon Aek Barumun. Dinamagihuthon Aek Barumun, sahat ma Guru Marjalang di sada huta na margoar Huta Bona Bulu manang Huta Lobu Botung. Di huta i, adong sada Sopo Bolon, inganan ni angka jolma laho martukkar angka suan-suanan manang pinahan nasida. (Songon Onan). Maringanan ma Guru Marjalang dihuta Lobu Botung i jala dipungka Ibana ma sada Huta di Lobu Motung I na margoar Huta Hasahatan, alai disi ma sude halak pasahathon angka parbue na niula nasida dohot angka na pinahan nasida. Ia dung maringanan Guru Marjalang di Huta Hasahatan na pinungka nai, dipauba ma goar na Gabe Namora Sinde, ala na gabe mamora do Guru Marjalang dung mamungka Huta Hasahatan i.
Marpinompar ma Guru Marjalang (Namora Sinde) jala saluhut pinompar na mangingani Luat Hasahatan. Jala digoari ma angka pinomparna Hasibuan Botung (Motung) umbahen na sian Lobu Botung nasida. Sian Huta Hasahatan na Di Lobu Motung, marserak ma pinompar ni Guru Marjalang, sahat tu Modang, Sosa, Pinarik dohot Janji Lobi, Sibuhuan.
Ia pinompar na Guru Marjalang, adong do sada na mansai tarbarita, Ima Suman Hasibuan ( Suman Hs). Siboto surat (Sastrawan) angkatan Balai Pustaka na manurat Buku “Mencari Pencuri Anak Perawan”. Gabe sada natua-tua na hinormatan do Ompunta on. Songon gabe sada paniroi di angka panggomgomi na adong di Tano Riau di tingki ni ngoluna. Pola do dibaen goarna gabe goar ni Godung Pustaha, ima Gedung Perpustakaan Suman HS.
Boru Natua-tua
Ia dihita pinompar ni Ompunta si Raja Hasibuan, tongtong marningot do hita di angka poda ni natua-tua tarsingot tu uhum dohot adat Dalihan Natolu na masa ditonga-tonga ni bangso batak. Ia molo didok Somba Marhula-hula, na sai ingot do hita di nasa hula-hula ni angka Ompunta, Ima Toga Raja Simatupang, Tuan Ria Manurung Sibuntuon Parsanggul Baringin, Raja Silepe Sinurat Janji Matogu suang songoni angka hula-hula ni ompunta na parjolo. Ai ndada holan marningot hita di angka hula-hula sian par ginjang, di naelek hita marboru, sai tagora do nasa raja pamorunanta sian ginjang, ima na ginoaran Boru Natua-tua. Songon naung dipatorang di ginjang ni surat on, lima ma boru ni si Raja Hasibuan, na marhamulian tu Raja Margumis Sitorus Pane, Raja Marsundung Simanjuntak, Raja Panjaitan, Raja Parluhutan Siahaan Sibuntuon, dohot Raja Siring-ringo.
Raja Margumis Sitorus Pane mangalap Boru Turasi marhuta di Lumban Lobu, Raja Marsundung Simanjuntak mangalap Boru Sande Balige marhutan di Sitindahon, Balige. Raja Panjaitan mangalap boru Taripar Laut marhuta di Sitorang, Raja Parluhutuan Siahaan mangalap boru Tumandi marhuta di Sibuntuon, Raja Siringo-ringo mangalap Boru Patar Nauli. Ia ianakhon ni Raja Marsundung Simanjuntak, ima Raja Parsuratan Simanjuntak, dialap do muse paribanna boru Hasibuan, ima Boru ni Raja Marjalo, suang songoni nang anak ni si Raja Panjaitan, ima Raja Situngo Panjaitan mangalap muse paribanna Boru Hasibuan tubu ni Si Raja Marjalo. Pahompu ni Raja Situngo, ima Raja Sijorat Paraliman – anak ni Raja Siponot -, mangalap paribanna do muse, Boru Hasibuan tubu ni Datu Rara.
Las do rohanta saluhut marga Hasibuan, di na singkop somba ni angka Raja ni Pamoruanta di hita. Diangka hasahatan ni Gokhon dohot Jou-jounta tu nasida, mansai ringgas do nasida mangalusi nang mangurupi hita angka hula-hula na. Suang songoni do hita mariadophon nasida, diangka na masa ulaon ni Raja Pamoruanta, molo tung sahat gora-gorana tu hita, ria do hita mangadopi ulaon i, tarlumobi na pasahathon angka hata nauli dohot hata pasu nang tangiangangta tu Debata. Ia didok hata ni natua-tua, Asa sinuan ma hariara di harbangan ni huta, Anggiat sai saut horas gabe ma hula-hulana, suang songoni nang pamoruanna.
Pinompar ni Guru Mangaloksa na hot marmarga Hasibuan
Molo pinompar ni Guru Mangaloksa nunga manjujung baringin na, jala mamungka margana be. Alai nang pe songoni adong dope pinompar ni Guru Mangaloksa na hot mamangke Marga ni Ompuna, ima marga Hasibuan. Ginoaran ma nasida Hasibuan Raja Ilangit, Hasibuan Harean, Hasibuan Dasopang dohot Hasibuan Mismis.
Hasibuan Raja Ilangit pinompar (pahompu) ni Raja Lumbantobing do, ima ianakhon ni Raja Lumban Jurjur ( Raja Najurjur). Hatiha i, ndang adong dope Marga ni siopat pusoran, marmarga Hasibuan dope angka pinompar ni Guru Mangaloksa. Molo sian si Raja Hasibuan, sundut paonomhon ma si Raja Ilangit. Di sada tingki, ro ma Raja Lumban Jurjur mandok tu anakna Si Raja Ilangit asa laho tu Huta Tinggi na di Dolok Sanggul, laho mangalap hahana (abangna). Ia dungi borhat ma Ibana marhoda dohot asuna. Ala ndang diboto Raja Ilangit dalan tu Huta Tinggi, disungkun ma halak na jumpangsa di dalan, jala dipabao halak i ma tu Si Raja Ilangit dalan tu Huta Tinggi, alai na uju tu Laguboti do dipaboa. Ia dung sahat Raja Ilangit di Huta Tinggi na di Laguboti, dilului ma hahana i, alai ndang dapotsa.
Dinaloja Raja Ilangit mangulului hahana i, marsitandaan ma Ibana dohot pinompar ni Ompu Raja Laguboti. Ala burju ni Raja Ilangit diida pinompar ni Ompu Raja Laguboti, dipasautma ibotona, Boru ni Hutapea Laguboti tu Raja Ilangit Hasibuan. Ia dinaro Raja Ilangit di Laguboti, nunga maringanan disi dongan tubuna marga Hasibuan pomparan ni Raja Marjalo, ima pinompar ni Saudagar Nabegu (Pande Anduri). Dung saut mangalap boru ni Ompu Raja Laguboti Raja Ilangit Hasibuan i, maringanan ma ibana di Huta Tinggi, rap dohot dongan tubu na pinompar ni Saudagar Nabegu.
Ia pinompar ni Guru Mangaloksa na di Silindung, dibahen nasida ma Pesta Bolon manompas bongbong di sundut paualuhon. 2 (dua) sundut dung borhat Raja Ilangit manadinghon Silindung. Ala ni i, didok Pomparan Raja Ilangit do, ndang na dohot nasida manompas bongbong, jala hot ma nasida mamboan Marga ni Ompuna Guru Mangaloksa marmarga Hasibuan.
Dipudian ni ari, godang do pinompar ni Raja Ilangit na manompas bongbong muse. I ma na marsiolian nasida dohot pinompar si Opat Pusoran. Ia pinompar ni Raja Ilangit naung manompas bongbong, diihuthon ma marga ni Ompu na Raja Lumbantobing, marmarga Lumbantobing ma nasida. Alai di pinompar ni Raja Ilangit na hot dope di Bongbong ni paradaton i, hot ma nasida marmarga Hasibuan.
Dung torop pinompar ni Si Opat Pusoran, adong do deba na marserak sahat tu Sipirok, Padang Bolak, Padang Sidempuan dohot tu Sibuhuan. Huta ni Halak Batak Angkola dohot Batak Mandailing. Torop do disi na Marmarga Hasibuan, pinompar ni Guru Hinobaan, Guru Maniti dohot Raja (Guru) Marjalang. Dinamaringan pinompar ni Si Opat Pusoran di huta ni Dongan Tubuna marga Hasibuan, gabe diboanhon ma muse marga ni Ompuna Guru Mangaloksa Hasibuan. Ala ni i, gabe adong ma na Marga Hasibuan Harean, ima marga Hutagalung Harean na tinggal di Mandailing. Suang songoni nang marga Hasibuan Dasopang, ima pinompar ni Hutabarat miralopak na mangingani huta Mandailing.
Pangunjungi
Adong do hata ni natua-tua na mandok : “Pauk-pauk hudali, pago-pago tarugi. Molo adong na tading ta ulahi, adong na sala tapauli.” Laos ido tong-tong hatahonon nami dipangujungi ni turi-turian on. Tarsongon naung parjolo pinasahat di patujulo ni surat on, maol do manghatindanghon hasintongon ni turi-turian on. Ai so adong bukti-bukti sejarah otentik na boi patuduhononhon laho memverifikasi angka data dohot barita na tarsurat i.
Di hami sandiri, ndang adong sidalian laho mandok na sintong situtu do surat on. Alai holan na patomu-tomu do hami, sian angka sumber na adong nijaha dohot angka poda ni natua-tua. Binahen gabe sada barita na singkop laho manggombarhon jujur ngolu ni angka ompunta si Jolo-jolo tubu Marga Hasibuan. Anggiat marhite i, boi tatanda angka ompunta, laos gabe ro holongta tu nasida. Marhite ima muse, taharinghothon ma mangula angka adat dohot uhum na uli, na pinungka angka ompunta tarsingot tu angka paradaton, partoromboon dohot budaya ni hita halak batak na mansai dengan dohot uli.
Sian na marragam surat dohot turi-turian na gabe referensi ni surat on, adong do barita na berbeda na sada dohot na asing. I ma na gabe versi-versi ni angka turi-turian i. Ringkot do i pinatorang di pangujungi ni surat on, asa boi laho siparate-ateonta, dinamangantusi singkop ni Turi-turian on. Ima tarsingot :
1. Anak ni Si Raja Hasibuan.
Adong do barita na mandok, ia anak ni Siraja Hasibuan sada do baoa, opat ma boru. Anakna nasasada i margoar ma Guru Hinobaan Hasibuan. Jala Guru Hinobaan Hasibuan mangalap Boru Manurung, boru ni Raja Si Jambang Manurung. Jala tubu ma anakna opat. Raja Marjalo, Guru Mangaloksa, Guru Maniti, dohot Guru Marjalang.
Maol do nijalo hatorangan on. Alana Raja Tuan Sogar Manurung marhaha maranggi do tu Raja Si Jambang Manurung. Ima pinompar ni Raja Mangarerak na sian Sibisa. Molo Mangalap Boru Manurung do Guru Hinobaan, boasa do ingkon dopangon ni Tuan Sogar Raja ni Pamoruannai dohot angka bere nai ??? Jala boasa ndang tandahon ni Guru Hinobaan Hula-hula nai, dinaro mangido Ogung Omas i laho paluonna.
Dung marsada sude pomparan ni Si Raja Hasibuan laho pajongjong tugu parsadaan na di Lumban Bao, on do sada konsensus (kesepakatan / hasadaan ni roha) ni hita, umbaen na dibaen 5 (lima) tiang ni tugu parsadaan i, ima na patuduhon na lima do anak baoa dohot lima boru tubu ni si Raja Hasibuan. Jala di ganup tiang i, di surathon do sude goar ni anak baoa dohot boru i.
2. Tugu Parsadaan ni si Raja Hasibuan
Si Raja Hasibuan marujung ngolu di huta Lobu Batugara, jala disuanhon disi. Adong do sada versi na mandok, hot dope saring-saring ni Si Raja Hasibuan di Lobu Batugara. Jala, adong do Batu Napir na disi. Versi na asing mandok, ia dung marhuta Si Raja Marjalo di Lumban Bao, dipanangkok Ibana do saring-saring ni Ama na i, jala disuanhon muse di huta na di Lumban Bao.
Di na laho pajongjong Tugu Parsadaan ni Si Raja Hasibuan, pola do sanga dua hali marsangkap pinompar ni Si Raja Hasibuan. Na parjolo ima di taon 1977 di patupa PEMAHAS (Persatuan Marga Hasibuan). Diuluhon ni angka natua-tua songon : Ir. Tombang Hasibuan, Cyrus Hutabarat, G.M. Panggabean, Prof. Apul Panggabean, Drs. Sagumani Lumbantobing, H. Amin Hasibuan dohot Gr. Julius Hasibuan. Hatiha i, sanga do adong naso satolop pinompar ni Si Raja Hasibuan, tarlumobi pomparan ni Raja Marjalo tarsingot di inganan ni Tugu Parsadaan i. Pomparan ni Raja Situstus dohot Ompu Talobu mandok di Lumban Bao do, alai pomparan ni Datu Rara mandok di Lobu Batugara do.
Di taon 1928, dipajongjong Demang Renatus Hutabarat do Tambak Simin di Lumban Bao, songon partinandahan na di Lumban Bao do saring-saring ni Raja Hasibuan dohot Raja Marjalo, ima Tambak sian simin parjolo na adong di Toba Uluan. Jala ima na naniihuthon angka natua-tua PEMAHAS inganan ni Tugu Parsadaan si Raja Hasibuan. Alai, ala naso satolop dope angka pomparan ni Si Raja Hasibuan, gabe sundat do dipajongjong tugu i, nang pe Tambak Simin ni Raja Hasibuan dohot Raja Marjalo na pinajongjong ni Demang Renatus Hutabarat nunga sanga “di-geledor” laho paratahon tano na di Lumban Bao i.
Mauliate ma di Tuhanta, di taon 2001, diuduti do sangkapta laho pajongjong Tugu Parsadaan, na pinatupa ni Panitia Pembangunan Tugu Si Raja Hasibuan, na niuluhon ni Otto Hasibuan dohot angka natua-tua na asing, na adong di bona pasogit nang na adong di angka tano parserahan. jala sada do rohanta manolopi inganan ni Tugu Parsadaan i di Lumban Bao, Sibuntuon.
3. Hula-hula ni Raja Marjalo Hasibuan.
Raja Marjalo parjolo mangalap Boru ni Tuan Ria Sibuntuon Parsanggul Baringin. Tubu ma anak na holan boru. Marujung ngolu ma Boru ni Tuan Ria, dialap Raja Marjalo ma muse Boru Manurung, ima Boru ni Raja Udan, anggi ni Tuan Ria. Tubu ma anakna tolu baoa.
Ia ditaon 2004, pajongjong tugu Parsadaan ma Pinompar ni Ompu Tuan Ria Sibuntuon Parsanggul Baringin. Hatiha i, roma boa-boa ni nasida tu Pinompar ni Raja Marjalo Hasibuan, laho mangalahat horba di ulaon horja na pajongjong tugu parsadaaan ni Tuan Ria. Na pajongjong Tugu ni Tuan Ria Parsanggul Baringin di Sibuntuon di taon 2004, hita do Marga Hasibuan na mangalahat horbo di Ulaon i. Jala natua-tua i do Ompu Mangarerak Hasibuan na manguluhon uduran ni hita Marga Hasibuan songon Boru Natua-tua di Ulaon Pesta Tugu i. Nang pe holan boru do tubu ni Boru ni Tuan Ria Manurung, hot do hita saluhut pinompar ni Raja Marjalo marbona ni ari sian ginjang tu nasida. Taingot do burju ni Tuan Ria Manurung na mangalehon Lumban Bao tu Raja Marjalo gabe huta ni Marga Hasibuan.
Na di taon 2013, Pajongjong tugu Parsadaan do muse Raja Udan Manurung di Sibuntuon. Sahat do gora-gora ni Pinompar ni Raja Udan tu hita pinompar ni Raja Marjalo, laho mangalahat horbo di Ulaon Horja Bolon i, songon sada Boru natua-tua.
Paniaran ni Raja Marjalo sipaitolu, ima boru Sinurat tubu ni Raja Silepe.. Na umpompar saluhut Hasibuan Datu Rara. Tolu ma hula-hula ni Raja Marjalo, ima Tuan Ria Manurung, Raja Udan Manurung, dohot Raja Silepe Sinurat.
Adong do sada barita sian Pomparan ni Saudagar Nabegu, na asing ninna na manubuhon Ompunta Saudagar Nabegu sian Ompunta Raja Situstus dohot Ompu Talobu, alai ndang tangkas ise do Soripada ni Raja Marjalo na manubuhon Saudagar Nabegu on. Jala didok, Parjolo do tubu Saudagar Nabegu sian Ompu Talobu, alai sian Ina na marimbang.
4. Anak Si Paidua ni Raja Marjalo.
Di tarombo ni Pomparan Raja Marjalo, adong do perbedaan tarsingot tu Anak Si Paidua ni Raja Marjalo. Adong do deba na mandok Ompu Talobu anak Si Paidua, adong muse do deba na mandok, Saudagar Nabegu (Pande Anduri) do anak si Paidua. Adong do na binoto sada latar belakang umbahen gabe na masa si songonon, alai molo didok hata ni natua-tua “Ndada pola manarigati bulung, manarigati bulung ni gaol, ndada pola manaringoti lunging manaringoti angka na dangol”. Ndang pola na ringhot si patariashonon i di surat on.
Maol do tutu na patontuhon partording ni partubu on. Alai pangidoanta, ndang pola siguluton on sihahaan manang sianggian ni partubu on. Na tangkas, ba sada do hita pinompar ni Ompunta Raja Marjalo. Molo didok hata ni natua-tua : Tampulak ni Sibaganding di Dolok ni Pangiringan, Horas jala gabe do hita na marhaha maranggi molo tangkas hita masipairing-iringan. I do na laho siingothononta. Molo pe sai tapasomal, na parjolo manggora tu Ompunta Ompu Talobu, ipe asa tu Ompunta Saudagar Nabegu, ndang na gabe patimbohon na sada dohot patoruhon na asing. Holan hasomalan sambing ma i.
5. Boru Natua-tua Patar Nauli tu Si Ringo-ringo
Di tarombo ni Pomparan ni si Raja Hasibuan na jolo, dibaritahon holan 4 do boru ni si Raja Hasibuan, ima Boru Turasi, Boru Sande Balige, Boru Taripar Laut, dohot Boru Rumandi. alai di tarombo na parpudi gabe 5 do didok boru ni si Raja Hasibuan, ima palimahon Boru Patar Nauli. Tarsingot tu Boru Patar Nauli na muli tu Raja Siringo-ringo, adong do na mandok, na so tubu ni Si Raja Hasibuan, alai tubu ni anakna do. Jala ndang muse pola didok, manang tubu ni anak ni si Raja Hasibuan nadia do.
Di taon 1960-an, adong ma sada rombongan marga Si Ringo-ringo na markapal sian Muara tu Tara Bunga, di tonga ni tao, ro ma alogo lubis na mamboan kapal nasida sahat tu tao ni Sigaol. Dung sahat kapal nasida di Tao ni Sigaol marbongin ma rombongan I di bagas ni Marga Hasibuan. Di na marborngin di Si Gaol nasida, dipaboa ma tu marga Hasibuan na di Sigaol na pinompar ni Boru Hasibuan nasida, jala adong do Boru nasida di huta na mamboanhon tondi ni boru Hasibuan i. Topat tingki i, laho marhorja bolon do pomparan ni Ompu Talobu di Sigaol, ima na laho patupahon Ulaon Manogu Batu na laho bahenon Batu Napir ni Ompu Talobu. Dipangido Marga Hasibuan ma, asa ro Marga Si Ringo-ringo jala asa diboan ma Boru nasida na mamboan Tondi ni Boru Hasibuan boru ni Raja Hasibuan.
Ro ma boru Si Ringo-ringo na mamboan Tondi ni Boru Patar Nauli tu Ulaon Manogu Batu Napir ni Ompu Talobu, sorop ma Tondi ni Boru Patar Nauli tu boru Si Ringo-ringo i, dipabotohon ma tu sude na marpungu di Ulaon I, Ia Boru Patar Nauli, tubu ni si Raja Hasibuan. Ima boru na siampudan na tinubuhon ni Mangiring Omas Br.Simatupang. Tading maetek do Ibana. Dinabingkas angka Ibotona sian Lobu Batu Gara dohot do Ibana di boan angka ibotona i. Rap dohot Guru Mangaloksa do ibana. Di na marjuji Guru Mangaloksa dohot Raja Si RIngo-ringo, ibana do dibahen taru na. Ala talu do Guru Mangaloksa na marjuji i, gabe diboan Raja Si Ringo-ringo do ibana jala dibahen gabe parsonduk bolon na.
Di na mamestahon Tugu Parsadaaan ni Raja Hasibuan hita di Lumban Bao, nunga ditotahon be na 5 (lima) do Boru ni Si Raja Hasibuan. Jala ro do Pomparan ni Raja Si Ringo-ringo ma sian Muara pasahathon siluana tu Ulaon i, songon uduran ni Boru Natua-tua. Ima na laho siihuthononta saonari, diangka naung ditolopi angka natua-tuanta.
6. Panggoraion di Ulaon Adat tu Dongan Tubu Pomparan ni Guru Mangaloksa na marmarga Hasibuan.
Guru Mangaloksa marhaha maranggi do tu Raja Marjalo, Guru Hinobaan, Guru Maniti dohot Raja (Guru) Marjalang. Molo pe, pinompar na naung manjujung marga na be, hot do nasida pinompar ni Si Raja Hasibuan. Suang songoni, molo adong pinompar ni Guru Mangaloksa na hot mamboanhon Marga Hasibuan, sada do nasida dohot Si Opat Pusoran pinompar ni Guru Mangaloksa. Ndang jadi na pabolat-bolathon ta nasida. Jala ndang jadi bahenonta marimbar panggoraon tu nasida. Molo pe adong na gabe Si Opat Pusoran adong na hot marmarga Hasibuan. Di Parjambaran nang diuduran, sisada panjoloan do nasida jala sisada uduran. Ima Anggi Doli / Haha Doli Pomparan ni Guru Mangaloksa.
Ramba na poso na so tubuan lata, halak na poso na so umboto agia aha. Tarsongon i do hami na manurathon surat on. Ala ni i, tung rade situtu do hami mangido angka panuturion dohot paniroion sian sude hita na mardongan tubu, tarlumobi Raja ni Hula-hula, nang songoni angka Raja Pamoruon nami na mamboto angka turi-turian ni ompunta Si Raja Hasibuan dohot pinomparna. Lam godang hita na mangalehon angka parbinotoanta dohot baritanta, lam dumengganan suraton tu joloan ni ari. Na boi patinghosonta do surat-surat on, molo adong angka barita na tuminghos sian na tarsurat nuaeang. Anggiat ma sakkap nami manurathon, boi dapothononta, ima na mangalehon sada barita ni hagabeon ni Ompunta si Raja Hasibuan, tu saluhut pinomparna angka naumposo. Jala tona ni Ompunta i, na ingkon somba do hita marhula-hula, manat mardongan tubu jala elek marboru.
Asa obut do ninna jambulon, ni pudun baen samara, na somba marhula-hula, marsundut-sundut soada mara.
Molo Hariara ninna bonana, Hariara ma tutu nang dangkana. Sai horas jala gabe pinaramana, suang songoni nang angka boruna.
Timbo ma tutu tiang ni ruma, sai tumimboan do tiang ni sopo. Nunga horas jala gabe angka ompunta na matua, sai lumobi horas jala gabe ma hita saluhut pinomparna na umposo.
Sahat ma solu tinogu tu bontean, bontean i hasoropan ni leang-leang. Nunga sahat tarsurat turi-turian ni Ompunta si Raja Hasibuan dohot pinompar na, sai sahat ma hita tu panggabean sahat nang tu parhorasan, sude angka pangidoan Amanta Debata ma na mangelean.
Ondolan ni angka Surat on.
1. Marsuddin Hasibuan, Drs. “Tarombo dan Legenda Raja Hasibuan dan Pinompar”, Vol. I. Lider Publisher, Jakarta, 2007.
2. W.M. Hutagalung, “Pustaha Batak, Tarombo dohot Turi-turian ni Bangso Batak”, CV. Tulus Jaya, Jakarta, 1991
3. Ramlan Hasibuan, “Hasibuan di Sibuhuan, Luhat Barumun di Padang Lawas”, ramhasbi.blogspot.com, 21 Desember 2011
4. Kaliamsyah Manurung AmPd, “Sejarah Batak”, sejarahlengkapbatak.blogspot.com, 16 Desember 2013
5. Ompu Lintong Hasibuan, “Tarombo Si Raja Batak dohot Si Raja Hasibuan” Surat Tangan ni ompu Silintong na ditolopi natua-tua ni Hasibuan sian Janji Matogu ( Puraja Salomo, Puraja Polin, Puraja Pulohot, Puraja Mira ) dohot na Sian Sigaol ( Puraja Pandua Parbubu, Puraja Daud, Puraja Pangulu Boni, Puraja Doli ). Ima ditingki na dipajongjong Pameranta Bolanda Parsanggarahan ONDER DISTRIK di Negeri Janji Matogu di taon 1921.
6. Poda ni angka natua-tua na sanga dipasahat tu panurat. Tarlumobi sian Damang nahinan, ima Ompu Mangarerak Hasibuan / Br. Doloksaribu, na di tingki ngoluna gabe sada natua-tua paniroi ni Marga Hasibuan sian Bona Pasogit di Sigaol sahat tu tano parserahan ( Sumatera Timur, Medan, Batam dohot Jakarta). Suang songoni sian Ompung ni Saluhut Marga Hasibuan na adong di Sosor Silobu, ima natua-tua i Gr. Julius Hasibuan / Br. Hutahaean. (Ompu Kesar), na gabe “saksi hidup” rencana pembangunan Tugu Parsadaan ni Si Raja Hasibuan na diuluhon ni PEMAHAS (Persatuan Marga Hasibuan). Ai dohot do natua-tua i gabe panitia (sebagai sekretaris) di taon 1977.
MARGA-MARGA KETURUNAN
sumber: http://dungan-amoeba.blogspot.co.id/
No comments:
Post a Comment